ਮਨੀ ਲਾਂਡਰਿੰਗ ਮਾਮਲਾ: ਈਡੀ ਵੱਲੋਂ ਪੰਜਾਬ ਦੇ ਮੰਤਰੀ ਸੰਜੀਵ ਅਰੋੜਾ ਨਾਲ ਜੁੜੀ ਕੰਪਨੀ ਦੀ 55.57 ਕਰੋੜ ਦੀ ਜਾਇਦਾਦ ਕੁਰਕ

ਲੁਧਿਆਣਾ

ਪ੍ਰਵਰਤਨ ਨਿਦੇਸ਼ਾਲਿਆ (ED) ਨੇ ਮਨੀ ਲਾਂਡਰਿੰਗ ਦੇ ਇੱਕ ਵੱਡੇ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕਰਦਿਆਂ ਪੰਜਾਬ ਸਰਕਾਰ ਦੇ ਮੰਤਰੀ ਸੰਜੀਵ ਅਰੋੜਾ ਨਾਲ ਸੰਬੰਧਿਤ ਕੰਪਨੀ ਮੈਸਰਜ਼ ਹੈਂਪਟਨ ਸਕਾਈ ਰਿਐਲਟੀ ਲਿਮਟਿਡ (ਪੁਰਾਣਾ ਨਾਮ ਮੈਸਰਜ਼ ਰਿਤੇਸ਼ ਪ੍ਰਾਪਰਟੀਜ਼ ਐਂਡ ਇੰਡਸਟਰੀਜ਼ ਲਿਮਟਿਡ) ਅਤੇ ਹੋਰਾਂ ਦੀ 55.57 ਕਰੋੜ ਰੁਪਏ ਦੀ ਚੱਲ-ਅਚੱਲ ਜਾਇਦਾਦ ਕੁਰਕ ਕਰ ਲਈ ਹੈ। ਕੁਰਕ ਕੀਤੀਆਂ ਗਈਆਂ ਜਾਇਦਾਦਾਂ ਵਿੱਚ ਬੈਂਕ ਖਾਤੇ, ਫਿਕਸਡ ਡਿਪਾਜ਼ਿਟ (FD), ਜ਼ਮੀਨ, ਕਮਰਸ਼ੀਅਲ ਸਪੇਸ ਅਤੇ ਆਲੀਸ਼ਾਨ ਰਿਹਾਇਸ਼ੀ ਅਪਾਰਟਮੈਂਟ ਸ਼ਾਮਲ ਹਨ, ਜੋ ਕਿ ਲੁਧਿਆਣਾ, ਚੰਡੀਗੜ੍ਹ ਅਤੇ ਗੁਰੂਗ੍ਰਾਮ ਵਰਗੇ ਪ੍ਰਮੁੱਖ ਸ਼ਹਿਰਾਂ ਵਿੱਚ ਸਥਿਤ ਹਨ। ਇਹ ਜਾਇਦਾਦਾਂ ਕੰਪਨੀ, ਸੰਜੀਵ ਅਰੋੜਾ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੇ ਨਾਮ 'ਤੇ ਦਰਜ ਹਨ।
ਇਹ ਪੂਰਾ ਮਾਮਲਾ ਮੋਬਾਈਲ ਫੋਨਾਂ ਦੇ ਫਰਜ਼ੀ ਨਿਰਯਾਤ (ਐਕਸਪੋਰਟ) ਨਾਲ ਜੁੜੇ ਕਰੋੜਾਂ ਰੁਪਏ ਦੇ ਘੁਟਾਲੇ ਅਤੇ ਮਨੀ ਲਾਂਡਰਿੰਗ ਨਾਲ ਸੰਬੰਧਿਤ ਹੈ। ਜਾਂਚ ਦੀ ਸ਼ੁਰੂਆਤ ਗੁਰੂਗ੍ਰਾਮ ਦੇ ਉਦਯੋਗ ਵਿਹਾਰ ਥਾਣੇ ਵਿੱਚ ਦਰਜ ਇੱਕ ਐਫਆਈਆਰ (FIR) ਤੋਂ ਹੋਈ ਸੀ, ਜਿਸ ਵਿੱਚ ਧੋਖਾਧੜੀ ਅਤੇ ਜਾਲਸਾਜ਼ੀ ਦੀਆਂ ਧਾਰਾਵਾਂ ਲਗਾਈਆਂ ਗਈਆਂ ਸਨ। ਮਾਮਲਾ ਪੀਐਮਐਲਏ (PMLA) ਐਕਟ ਦੇ ਅਧੀਨ ਆਉਣ ਕਾਰਨ ਈਡੀ ਨੇ ਇਸ ਦੀ ਜਾਂਚ ਆਪਣੇ ਹੱਥ ਵਿੱਚ ਲਈ ਸੀ।
ਈਡੀ ਦੀ ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਇਸ ਰੀਅਲ ਅਸਟੇਟ ਕੰਪਨੀ ਨੇ ਵਿੱਤੀ ਸਾਲ 2023-24 ਦੌਰਾਨ ਕਾਗਜ਼ਾਂ ਵਿੱਚ ਕਰੀਬ 157 ਕਰੋੜ ਰੁਪਏ ਦੇ ਮੋਬਾਈਲ ਫੋਨਾਂ ਦੀ ਵਿਕਰੀ ਦਿਖਾਈ ਸੀ। ਇਸ ਵਿੱਚੋਂ 102.50 ਕਰੋੜ ਰੁਪਏ ਦੇ ਮੋਬਾਈਲ ਦੁਬਈ ਦੀਆਂ ਦੋ ਕੰਪਨੀਆਂ ਨੂੰ ਐਕਸਪੋਰਟ ਕਰਨਾ ਦਿਖਾਇਆ ਗਿਆ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਜਿਨ੍ਹਾਂ ਸਥਾਨਕ ਸਪਲਾਇਰਾਂ ਤੋਂ ਮੋਬਾਈਲ ਖਰੀਦਣਾ ਦਿਖਾਇਆ ਗਿਆ ਸੀ, ਉਹ ਸਿਰਫ਼ ਕਾਗਜ਼ੀ (ਸ਼ੈੱਲ) ਕੰਪਨੀਆਂ ਸਨ ਜੋ ਇੱਕੋ ਮੋਬਾਈਲ ਨੰਬਰ ਅਤੇ ਈਮੇਲ ਆਈਡੀ 'ਤੇ ਚੱਲ ਰਹੀਆਂ ਸਨ। ਇਨ੍ਹਾਂ ਦਾ ਕੰਮ ਸਿਰਫ਼ ਫਰਜ਼ੀ ਬਿੱਲ ਬਣਾਉਣਾ ਸੀ।
ਈਡੀ ਮੁਤਾਬਕ ਦੁਬਈ ਦੀਆਂ ਕੰਪਨੀਆਂ ਦਾ ਰਿਮੋਟ ਕੰਟਰੋਲ ਵੀ ਇਸੇ ਮੁਲਜ਼ਮ ਗਰੁੱਪ ਦੇ ਹੱਥਾਂ ਵਿੱਚ ਸੀ, ਯਾਨੀ ਬਿਨਾਂ ਕਿਸੇ ਸਮਾਨ ਦੀ ਡਿਲੀਵਰੀ ਕੀਤੇ ਸਿਰਫ਼ ਕਾਗਜ਼ਾਂ 'ਤੇ ਹੀ ਕਰੋੜਾਂ ਦਾ ਐਕਸਪੋਰਟ-ਇੰਪੋਰਟ ਚੱਲ ਰਿਹਾ ਸੀ। ਈਡੀ ਨੇ ਇਸ ਘੁਟਾਲੇ ਤੋਂ ਹੋਈ ਕਮਾਈ (Crime Proceeds) ਦੀ ਕੁੱਲ ਰਕਮ ਕਰੀਬ 102.99 ਕਰੋੜ ਰੁਪਏ ਆਂਕੀ ਹੈ। ਇਸ ਮਾਮਲੇ ਵਿੱਚ ਮੁੱਖ ਮੁਲਜ਼ਮ ਸੰਜੀਵ ਅਰੋੜਾ ਨੂੰ ਈਡੀ ਵੱਲੋਂ ਪਹਿਲਾਂ ਹੀ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ ਅਤੇ ਫਿਲਹਾਲ ਉਹ ਨਿਆਇਕ ਹਿਰਾਸਤ ਵਿੱਚ ਹਨ। ਏਜੰਸੀ ਵੱਲੋਂ ਸਥਾਨਕ ਵਿਕਰੀ (ਲੋਕਲ ਸੇਲ) ਨੂੰ ਲੈ ਕੇ ਜਾਂਚ ਅਜੇ ਵੀ ਜਾਰੀ ਹੈ।

---

Enforcement Directorate (ED) attaches assets worth ₹55.57 crore belonging to Punjab Minister Sanjeev Arora's linked company, Hampton Sky Realty MD, in a high-profile ₹102.99 crore fake mobile export money laundering scam.

प्रवर्तन निदेशालय (ED) ने पंजाब ਦੇ मंत्री संजीव अरोड़ा से जुड़ी कंपनी हैम्पटन स्काई रियल्टी की ₹55.57 करोड़ की संपत्ति कुर्क की है। यह कार्रवाई ₹102.99 करोड़ के फर्जी मोबाइल एक्सपोर्ट और मनी लॉन्ड्रिंग मामले में की गई है।